Հայ ժողովուրդն այսօր նշում է Հայաստանի Անկախության 20-ամյակը: Իսկ Երևանի համար կրկնակի տոն է. Հայաստանի մայրաքաղաքը դառնում է 2793 տարեկան: Երևանում տոնական տրամադրություն է. մայրաքաղաքի տարբեր համայնքներում անցկացվում են բազմաբնույթ միջոցառումներ:

Մայրաքաղաքի փողոցներում աշխուժություն է տիրում: Երեխաները փուչիկներով, դրոշակներով շտապում են դեպի Հանրապետության հրապարակ: Փորձեցինք պարզել, թե ինչպես են երևանցիները նշում և անկախության տոնը, և Երևանի օրը: Զարմանալի էր, որ բոլորն էլ ցանկանում էին խոսել:

«Սիրում եմ Հայաստանը, իմ Երևանը, այնքան եմ սիրում, որ հիմա ուզում եմ նույնիսկ լացել: Հպարտանում եմ այս զինվորներով, հպարտանում եմ, որ հայ եմ: Այսօր կրկնակի տոն է, այսօր բոլոր ընտանիքներում պետք է խանդավառություն լինի: Ուզում եմ, որ բոլորն էլ ուրախանան և այս տոնից հետո Հայաստանից գնալու մասին երբեք չմտածեն»,- Panorama.am-ի հետ զրույցում ոգևորված ասում էր ուսանող Մանեն: Մանեին հերթ չէին տալիս նրա համակուրսեցիները: «Սիրում ենք Երևանը, շատ ենք սիրում, հարազատ շատ հարազատ բան կա այս քաղաքում, սիրում ենք Երևանի լուսավոր ու խորհրդավոր գիշերները, էն ամենը ինչ կապված է Երևանի հետ»,- ոգևորված մեջբերեցին ԵՊՀ-ի ուսանողները:

5-ամյա Հայկն էլ, ով ծնողների հետ մասնակցում էր Հանրապետության հրապարակում անցկացվող շքերթին, ոգևորված բացականչում էր. «Զինվորները, ես էլ եմ զինվոր դառնալու»: Մեզ հետ զրույցում Հայկի հայրիկն ասաց, որ անհամբեր սպասում էին այս տոնակատարությանը: Նույնիսկ շքերթի փորձին են մասնակցել: «Շատ հուզված եմ, հիշում եմ 1991թ.-ի սեպտեմբերի 21-ը, երբ ընդամները 13 տարեկան էի: ԱՅՈ ասելու իրավունք չունեի, բայց ծնողներիս հետ գնացել էի հանրաքվեի: Հասկանում էի, որ հայ ժողովրդի համար շատ կարևոր իրադարձություն է տեղի ունենում, որ վերջապես պապիկիս երազած անկախ Հայաստանում ենք ապրելու: Այսօր ուզում եմ միայն լավ բաներ հիշել, որ որդուս հիշողության մեջ էլ միայն բարի հուշեր լինեն»:

Շքերթին մասնակցում էին նաև սփյուռքահայեր, որոնց կրծքներին փակցված էին եռագույնով ժապավեններ: Ֆրանսահայ Ռուբենը նշեց, որ Անկախության 20-ամյակին նվիրված միջոցառումներին մասնակցելու նպատակով ընտանիքի հետ եկել է Հայաստան: «Հուզված եմ, երբեք նման շքերթի չեմ մասնակցել: Սա բոլոր հայերի տոնն է: Սրտի թրթիռով եմ հետևում այս ամենին ու հպարտանում, որ հայ եմ: Շնորհավորում եմ բոլորիս այս հրաշք տոնի կապակցությամբ, նաև երևանցիներին, ովքեր այսօր նշում են մեր գեղեցիկ մայրաքաղաքի ծնունդը»,- ասաց ֆրանսահայ Ռուբենը:

Ավելի քան 10 տարի ԱՄՆ-ում բնակություն հաստատած Արմենը մեզ հետ զրույցում նշեց, որ վերջին անգամ Հայաստան է եկել 4 տարի առաջ, բայց Երևանը բավականին փոխվել է: «Չեք պատկերացնի, թե որքան եմ կարոտում, ամեն անգամ որոշում եմ ամեն ինչ թողնել ու վերադառնալ: Վստահ եմ, որ գալու եմ, եթե ոչ այսօր, ապա վաղը, մյուս օրը, բայց գալու եմ: Շնորհավորում եմ հայ ժողովրդին անկախության 20-ամյակի առթիվ ու ցանկանում եմ, որ բոլորն ապրեն իրենց երազած Հայրենիքում: Տոնդ շնորհավոր, Հայաստան ջաաաան»,- հուզված ասաց Ռուբենը և ավելացրեց, որ հաճախ է լսում Ռուբեն Հախվերդյանի երգերը ու ամեն անգամ լսելուց հասկանում, որ որքան էլ լավ պայմաններում ապրի, բայց առանց Երևանի, առանց երևանյան կոլորիտի կյանքը մի տեսակ դատարկ է: Վերջում Ռուբենը հուզված երգեց. «Ես քեզ սիրում եմ»,- այս խոսքերը ասում եմ քեզ, ի'մ Էրևան, արժեր հասնել աշխարհի ծերը, որ էս բառերը հասկանամ…….»: